Crisis climática
Acción polo clima fronte á pasividade

Son aproximadamente as seis da tarde do xoves 3 de outubro. No centro dunha das rúas máis turísticas de Compostela un grupo de activistas, vestidos con monos brancos, interrompen o tránsito. O centro da acción performativa ocúpao un globo terrestre sobre unha pota que semella estar a ferver. Ao carón desta figura unha activista sostén un cartaz coa lenda “ti estás aquí”. A veciñanza e os turistas, que a esa hora pasan pola rúa flanqueada por un local de tapas low cost e unha tenda de embutidos salmantinos, vense na necesidade de sortear o grupo activista. “A finalidade da acción é sensibilizar á cidadanía sobre a emerxencia climática e presionar aos lobbys políticos e empresariais para que tomen medidas urxentes xa” afirman nun comunicado difundido horas antes.

A performance organizaa o movemento 2020: Rebelión polo clima, “unha plataforma de acción non violenta fronte á crise climática (social, ecositémica e económica)”, informan. Fórmanse a partir do movemento europeo By2020 we rise up “no que están a participar moitas organizacións ecoloxistas do mundo”, comeza a contar Aura, unha das dúas portavoces da acción. “Naceu con Extinction Rebellion, unha asociación nacida no Reino Unido o ano pasado e que se rixe por tres puntos básicos e dez principios”, continúa. En palabras de Cai, o outro portavoz, “as tres demandas simplemente son: que se comece a dicir xa a verdade desde os gobernos e desde os medios de comunicación; que se comece a divulgar a emerxencia climática, a inminencia do colapso ecolóxico, do cambio climático e das consecuencias catastróficas que terá; e que se comece a actuar xa”.

“By2020 é unha plataforma que está a aglutinar hoxe en día a moitos máis movementos: en España a Ecoloxistas en Acción ou Fridays for Future”, continúa Cai. Trátase dunha “iniciativa que vai un pouco máis alá das manifestacións e busca unha estratexia de protesta un pouco distinta”, matiza. “A desobediencia civil non-violenta”, puntualiza Aura. De todos xeitos “agora mesmo non estamos a desobedecer, non estamos a incumplir ningunha lei, porque non estamos bloqueando, só estamos obstruindo, mais si que é unha acción directa non-violenta, non é simplemente unha manifestación”, remata Cai.

Outras reivindicacións

No comunicado difundido pola tarde, o grupo activista afirma que é innegábel a emerxencia climática como o “amosa o último imporme do Grupo Intergovernamental de Expertos sobre o Cambio Climático (IPCC): contamos con tan só 11 anos para reducir nun 50% as emisións de gases de efectos invernadoiro e evitar que esta crise sexa irreversíbel”.

Nese sentido recollen unha serie de reivindicacións entre as que inclúen que se realice unha “transición enerxética xusta, sostíbel e social cara ao mundo das renovábeis” ou provocar unha mudanza de mentalidade na sociedade que “permita abandoar as dinámicas consumistas e materialistas”. Tamén defenden a aplicación de “políticas agrarias favorecedoras da soberanía alimentaria con base en produtos de proximidade e sustentábeis”, e que se desenvolvan “propostas de adaptación ao incremento da temperatura dos 1.5ºC e as súas consecuencias” que segundo as súas palabras para Galiza suporían “aumento do nivel do mar, incremento das secas, incendios, especies invasoras e fenómenos meteorolóxicos extremos”.

Para o 7 de outubro prepárase unha grande acción internacional que no caso do Estado español terá lugar en Madrid. E propóñense continuar con mais mobilizacións en xaneiro e na videira primavera até que “as reivindicacións sociais se transformen en medidas políticas”, en palabras das activistas.