Laboral
A Garda Civil desaloxa as traballadoras que se encerraron en Inditex pola negociación do seu convenio

As traballadoras que permanecían pechadas desde a mañá do venres na sede de Inditex foron desaloxadas. A empresa procedeu a denuncialas e chamar á Garda Civil, que entrou no local sobre as 21.30h deste luns, dicíndolles que debían abandonar o local ou serían desaloxadas pola forza. Tras as ameazas e ante a reiterada negativa da multinacional de Amancio Ortega a recibilas e cumprir co seu acordo, decidiron abandonar voluntariamente a protesta.

Este martes cumprían o seu quinto día pechadas. Varias dependentas, delegadas sindicais da CIG, víronse na obriga de pecharse no auditorio de Inditex na sede central da compañía en Arteixo (A Coruña) desde o venres para esixir que a empresa fose consecuente co seu compromiso de reabrir as negociacións provinciais para abordar as súas condicións laborais e melloras sociais que estaban pendentes de forma específica.

Os delegadas da CIG, que representan a máis do 70% dos empregados na provincia, buscaban con esta acción reivindicativa reafirmar o compromiso que Inditex asumiu o pasado decembro e defender o seu dereito a negociar as súas condicións laborais a nivel coruñés, tal como fan os traballadores doutras empresas do grupo. Critican a política de Inditex de centralizar e xestionar as relacións laborais desde Madrid, ignorando as necesidades específicas de provincias como A Coruña, así o explica Carmiña Naveiro, delegada da CIG en conversación co Salto desde a central de Inditex

Esixen demandas específicas para o persoal da provincia

As traballadoras delegadas subliñan que as súas demandas a Inditex limítanse a aspectos que afectan exclusivamente á provincia. Entre elas, inclúense o plus de antigüidade previamente contemplado no convenio e que aínda conservan outros empregados da empresa, beneficios de alimentación e a homoxeneización e equiparación de todas as condicións establecidas nos comités de empresa de cada cadea.

Consideran “inxusto e discriminatorio” que, dentro de una mesma provincia, as traballadoras teñan diferentes condicións en aspectos como calendarios, sábados libres, permisos, descansos, xornadas, categorías ou complementos.

Mentres esperan a resposta da multinacional tras a acción iniciada o pasado venres, as traballadoras continúan a mobilizarse en defensa dos seus dereitos e xa convocaron unha folga para o 27 de xuño, coincidindo co inicio do período de rebaixas. Por agora, explica Naveiro, a resposta da multinacional foi “tratar de intimidalas con accións legais”.