Justicia
Julia Álvarez Martín: “A nosa profesión é especialmente conservadora”

Julia Álvarez (O Grove, 1986) fundou no ano 2016, xunto con outras dúas compañeiras da profesión, Eva Rosende e Miguel Vázquez, a primeira cooperativa de avogadas e avogados de Galicia, Artigo 14. O proxecto naceu coa crenza de que o modelo económico convencional ten que mudar, así que, fronte ao individualismo, propoñen a unión e o traballo en rede. Artigo 14 son un grupo de persoas con vontade de transformación social e implicada en distintas causas, asociacións e colectivos.

De onde xurdiu a idea de montar unha cooperativa xurídica?
Viñamos as tres de diferentes experiencias laborais e decidimos iniciar un proxecto xuntas, pero realmente o que queriamos facer nós non encaixaba co modelo tradicional dun despacho de avogados. Nun encontro da Rede de Economía Alternativa e Solidaria (REAS) en Zaragoza coñecemos unha rede de cooperativas xurídicas a nivel estatal que estaba a crearse, na que participaban despachos como Red Jurídica de Madrid, Col-lectiu Ronda e IACTA Sociojurídica de Catalunya ou Abogad@s en Red de Granada, e vimos que outras formas de exercer e de entender o dereito eran posibles.

Con todos os avogados que hai en Galiza, por que pensas que sodes a primeira cooperativa?
Porque non interesa explicar este modelo. Nin na Facultade de Dereito nin no Máster en Avogacía se expón nunca a fórmula da cooperativa coma unha posible opción para exercer, céntranse só nas Sociedades Civís, Limitadas ou Profesionais. Tamén penso que é porque a nosa profesión é especialmente conservadora e suxerir un modelo anticapitalista, incluído dentro da economía social e solidaria, parece un acto case subversivo.

Ademais traballades en galego, como está a situación da lingua no ámbito xurídico?
Soamente o 5% da linguaxe xurídica en Galicia é en galego polo que a situación é bastante alarmante. Ademais, dende a Xunta faise todo o posible para perpetuar esta situación, xa que, pese a que se reclama constantemente un cambio, continúan imposibilitando cousas tan básicas como que os programas informáticos dos xulgados, que serven para xerar toda a documentación dos procedementos xudiciais, teñan a opción de estar en galego.

Ultimamente fálase moito da importancia de xulgar con perspectiva de xénero, por que é necesario practicar a avogacía con esta perspectiva?
O dereito non é unha ciencia neutral, senón que o modelo xurídico contribuíu e contribúe en gran medida á subordinación das mulleres, polo que o exercicio da avogacía é un importante campo de batalla para defender unha vida digna en igualdade para todas. Evidentemente é fundamental practicar a avogacía con perspectiva de xénero e considero que debería ser obrigatoria unha formación especializada para poder exercer na xurisdición penal (violencia de xénero e delitos contra a integridade sexual), laboral e de familia.