Elecciones
“Podemos será o único que manteña un imposto ás grandes fortunas galegas como a de Amancio Ortega”

Aínda que as enquisas apuntan a que conseguir un acta de deputada é pouco probable, Isabel Faraldo (A Coruña, 1966) é optimista: “Déronnos tantas veces por mortas, que non nos vai asustar que o volvan intentar facer”. A candidata de Podemos á Xunta de Galiza defende que a súa formación está a reconstruírse no país e aspira ser a chave que permita o primeiro goberno galego progresista en cinco lustros. 

As bases da súa estratexia para mobilizar o voto de esquerdas na última semana de campaña serán a defensa dun refortalecemento da sanidade pública, a defensa do medioambiente ante os grandes conflitos socias do momento e a aplicación dun sistema fiscal “máis xusto” e que redistribúa a riqueza.

Agás as europeas de 2014, chegamos ás primeiras eleccións dende que se fundou Podemos onde haberá papeleta exclusiva do partido en Galiza. En cambio, tamén son nas que peor proxección teñen, sempre segundo as enquisas. Entendo que é unha boa nova para a militancia a nivel interno, pero cre que tamén o é para ensanchar o espazo electoral?
Cóntoche unha anécdota. Nunha asemblea a nivel de toda Galiza que fixemos hai pouco, unha compañeira levantou a man e dixo: “Durante dez anos, eu votei a Podemos, pero nunca collendo a papeleta de Podemos”, máis alá de, efectivamente, as eleccións europeas de 2014. É a primeira vez. Creo que iso é moi significativo. Primeiro, a nivel identitario e, segundo, a nivel da reconstrución dun partido que tivo un caudal enorme e que desperdiciou, non el, senón toda a etapa das confluencias e alianzas que non resultaron como tiñan que resultar. Neste momento, Podemos ten un proxecto propio. Estamos en vías e con ánimo de defendelo, pero claro vamos empezar dende moitos chanzos atrás. Creo que con convicción e con compromiso, seremos quen de sacar este proxecto adiante.

Hai agora dous meses, o 62,36% da militancia de Podemos Galicia rexeitou concorrer en coalición con Sumar ás eleccións malia un preacordo entre as direccións das que vostede formaba parte. Que foi o que pasou?
Dicir que había un preacordo é como dicir que se chegou a un consenso e iso non foi así. Había un acordo que para nós era xa naquel momento precario é pobre e así o expuxemos nas mesas de negociación, e nós tiñamos a obriga de que fora militancia quen se pronunciara e foi a propia militancia a que veu o que nós tamén estabamos a ver: era un acordo que ninguneaba e ocultaba a forza que somos. Eramos como unha especie de exército invisible no que a nosa militancia non ía ter capacidade algunha de decisión. Tiñamos xa unha candidatura refrendada polas bases no caso de que o acordo con Sumar non chegase e aquí estamos.

“Votei en branco na consulta sobre a coalición de Sumar e Podemos en Galicia. Non podía apoiar un proxecto no que non cría”

En que medida afectou que un dos editoriais de Canal Red pedise o voto explicitamente ao BNG?
Evidentemente, todo inflúe, pero non creo que iso fose determinante. Se miramos para atrás, hai un percorrido ao longo de todo un ano no que á militancia de Podemos vai observando como o seu partido queda ninguneado e apartado. Creo que o vivido desde xullo foi bastante significativo a ese nivel. O feito de que as nosas dirixentes e deputadas víranse na obriga de ter que pasar para o grupo mixto pois pesa bastante. Non creo que fora só ese editorial, digamos, táctico, senón que hai moitos máis elementos nos que poñer o foco.

Vostede votou nesas primarias?
O voto é secreto, pero mira vouche ser moi sincera: votei, pero o meu voto foi en branco. Non era capaz de votar en contra dunha coalición na que xuntar forzas, pero por outra parte tampouco podía apoiar un proxecto no que non cría nin me vía facendo unha campaña na que non tiña plena convicción.

Que lectura fai Podemos sobre a reconciliación de Anova co BNG?
Anova foron compañeiros de camiño nun momento no que Podemos estaba no punto máis alto da onda. Neste momento, pois Anova volve á casa. Creo que pouco máis teño que dicir. Se cadra, era o esperado.

“Malgastouse o caudal do que foron as 'mareas' por non estar todas a unha e pagámolo caro”

Pregúntollo doutro xeito. É un fracaso para o espazo político das mareas?
Foi un fracaso. Malgastouse o caudal do que foron as mareas por no estar todas a unha e pagámolo caro. Era un todo con vós, pero sen vós. Esa sensación de non estar unidas realmente, de que eran só unións para gañar unhas eleccións, pois fixo o bastante dano. Pensa que tivemos once cidades rebeldes que se perderon. Tivemos unha chea de representantes nos diferentes parlamentos autonómicos e se perderon. Todo iso influíu. Ademais do esgotamento propio de Podemos polas loitas internas e, sobre todo, a influencia dos ataques dos medios de comunicación.

Atendendo á demoscopia, o escenario é complexo para que Podemos acceda a un acta de deputada no Parlamento galego, queda unha semana de campaña. Cales van ser as claves estratéxicas para apelar ao voto da esquerda e conseguir esa mobilización?
O que mellor nos representa é o lema da campaña: defende as túas ideas. Creo que frontes os tacticismos electoralistas e sobre todo tendenciosos dalgunhas enquisas, pois temos que seguir defendendo o que somos. Temos un proxecto transformador, un proxecto valente. É un proxecto que di o que outras calan. Por exemplo, Podemos será o único que manteña un imposto ás grandes fortunas galegas como a de Amancio Ortega. Máis alá de ser temporal, ten que ser definitivo. Ademais temos que romper con esa fiscalidade protectora dalgunhas grandes fortunas. Poñendo un imposto ás empresas de máis de 100 millóns, suporía, cunha reforma fiscal, poder ingresar só en Galiza uns 1.600 millóns de euros. Imaxina o que iso suporía para os servizos públicos desta terra nosa.

Que di (e que non) o barómetro do CIS sobre Galiza?

Alejandro Solís Rodríguez

Análisis

Análise Que di (e que non) o barómetro do CIS sobre Galiza?

Alejandro Solís Rodríguez

Os mesmos datos do Barómetro a permiten realizar outra lectura na que o PP parte con máis vantaxe e o BNG superaría o rendemento que lle outorga o Centro de Investigacións Sociolóxicas.

Cal é a diagnose que fai logo de 15 anos de gobernos do PP. Primeiro de Alberto Núñez Feijóo e agora de Alfonso Rueda?
Vímolo na última crise dos pellets. En Galiza temos unha fundación que é o Centro Tecnolóxico do Mar. Unha fundación creada con fondos públicos e dirixida pola tía do presidente da Xunta, Alfonso Rueda. De súpeto, chega un desastre medioambiental precisamente baseado nunha das áreas nas que traballa, que é a influencia dos microplásticos no mar, e nin se lles ve nin aparecen. Inoperancial total. E logo, contratan a unha empresa de marketing vinculada ao PP para a limpeza das praias. Que nos ensina isto? As súas redes clientelares que afogan o país e que se sinten impunes para todo. Esta é a situación que estamos na obriga de romper en Galiza.

Cales son as prioridades para Podemos en Galiza?
Falo como traballadora e como cidadá e sosténdome nos informes do Defensor do Paciente: a sanidade pública en Galiza está na UCI. Isto son vidas humanas. O recorte de 2.000 millóns conseguiron que teñamos a Atención Primaria máis saturada do Estado, poñer contra as cordas as Urxencias e sobrecargar, máis aínda, a un persoal que está no límite. Temos 40.000 intervencións cirúrxicas en espera. Temos máis de 9.000 persoas esperando pola súa primeira cita en saúde mental. Temos un servicio de ambulancias externalizado, os técnicos de ambulancias absolutamente saturados e con 129 ambulancias para toda Galiza coa nosa dispersión poboacional. É urxente revertir esta situación ampliando así investimentos na sanidade pública e facendo ademais un plan de separación entre a atención primaria e a atención hospitalaria.

A nivel medioambiental vivimos tempos convulsos e todo semella de que irán a peor. Unha implantación descontrolada da enerxía eólica, a apertura de proxectos mineiros, a prórroga de ENCE, a xestión do desastre dos pellets... Como debería enfrontar un goberno progresista esta problemática?
Xusto aí é onde se ve a necesidade absoluta de botar ao PP do Goberno. Ademais citas un dos sectores onde se ve máis esa xestión e nepotista. As macroeólicas. Nós non estamos en contra das eólicas, todo o contrario. Pero é que estamos vendo que non se está controlando o impacto sobre o territorio e aínda por riba enterámonos de que os informes de impacto ambiental estanos a facer os técnicos das propias empresas. Non debemos esquecer que a exconselleira de Medio Ambiente con Feijóo, Beatriz Mato, ten hoxe unha cadeira no consello de administración de Greenalia, unha das grandes adxudicatarias destes parques. Ademais de ser unha das grandes produtoras de eletricidade e ter unha das facturas máis caras.

Que Galiza cre que virá despois do 18F se a dereita abandona a Xunta?

Unha Galiza plural, unha Galiza fermosísima porque se vai quitar o gris de enriba. Vaise quitar esa cultura nefasta de redes clientelares. Dígoo moito porque me doe pensar que todo o potencial de Galiza queda nun negocio para catro. Vén unha Galiza alegre e plural. Ímolo ver o 18 de febreiro.

Galiza precisa máis que nunca un xornalismo libre que estea financiado polas maiorías sociais

O Salto Galiza

O Salto medra contigo

O Salto medra contigo Galiza precisa máis que nunca un xornalismo libre que estea financiado polas maiorías sociais

O Salto Galiza

Depois das eleccións do 18 de febreiro, a deriva conservadora e neoliberal do país continúa. Por iso, ofrecémosche seguir traballando en contidos críticos que fiscalicen o poder político e económico. Para iso, precisámoste. Subscríbete ao Salto.