Universidad
Acción Universitaria: “Propoñemos dotar de máis recursos ao estudantado e aumentar o número de bolsas”

O sindicato estudantil Acción Universitaria non apoia a folga convocada por ANEGA nin o aprobado xeral, que din, agudizaría as diferencias de clase entre os estudantes. Tampouco concordan coas propostas das reitorías e rexeitan o anuncio do Ministerio de Universidades de acabar ao curso nos prazos establecidos. Martín Rey explica que canda a rede estatal Estudantes en Movemento levaron as súas propostas ao Ministerio, mais por agora “non nos están facendo moito caso”.

Por que non apoiades a folga estudantil?
Estamos en contra porque non estamos dacordo nin co fondo nin coa forma. Non somos esquirois nin chamamos á esquirolaxe, e entendemos que as reivindicacións son lexítimas. O estudantado ten dereito a defendelas, pero nós non compartimos a proposta de aprobado xeral. Pensamos que non é unha solución para as clases populares, que son as máis afectadas pola situación. Esta medida o que ven a facer é deixar de esixir ás institucións educativas que doten de recursos e de medios para saír da crise coa menor repercusión para o estudantado.

E despois pola forma da folga, porque é unha folga completamente oportunista, convocada de xeito unilateral e sen ter coñecemento das reivindicacións do estudantado. Está tendo moita repercusión en redes sociais, pero as redes sociais non son un reflexo do que está a esixir o estudantado nas aulas.

Credes entón que non é representativo de todo o estudantado?
Cremos que representa a unha parte do estudantado e son reivindicacións lexítimas, e entendémolas. Se existen represalias contra as estudantes que fan a folga, os profesores e reitorados vannos ter en fronte, pero non é unha folga que saia desde a base do estudantado nin das asambleas. É unha folga que ven desde arriba, dunha organización sindical.

Pedides máis recursos para que non empeore a calidade docente. A que vos referides en concreto?
As institucións educativas non están sendo capaces de dotar ao estudantado popular de medios e recursos. Non falamos da devaluación da formación desde un punto de vista liberal, senón de que realmente o aprobado xeral pode nun futuro, agudizar máis as diferencias de clase entre o estudantado. Quen máis van sufrir a devaluación da formación van ser os estudantes que por exemplo, non poden ir a Madrid a pagarse un máster de 10.000 euros ou non poden acceder a outra educación complementaria para reforzar a súa formación. Ademais, o aprobado xeral tal e como está formulado supón unha sobrecarga de traballo porque as institucións non o van permitir. Nós propoñemos unha solución máis práctica, que é dotar de máis recursos e medios e sobre todo aumentar o número de bolsas.

Tamén remataría o curso máis tarde.
Se hai que facer unha recalendarización do curso académico, habería que facela, tendo presente que a docencia telemática non está sendo efectiva porque por unha banda, o profesorado non está sabendo dala e por outra, unha parte do estudantado non está tendo medios para recibila. E no caso que sexa preciso, ter un exame presencial, obviamente só cos contidos aos que tivemos acceso.

Que pasaría co sobrecusto do aluguer de rematar máis tarde?
Temos que ter en conta que tamén afecta ás familias do estudantado, que non poderían pagar os gastos de transporte, aluguer, etc. Para que ese custo non caia nas familias, pensamos que se debería habilitar ou ben vivenda pública gratuíta ou residencias por parte das universidades, Xunta e quen teña competencia. Nese sentido, apoiamos a folga de alugueres formulada polo Plan de Choque Social.

O Ministerio de Universidades anunciou que o curso vai rematar nos prazos estipulados e con avaliación. Védelo factible?
Non. É practicamente tirar pola borda e deixar atrás a todo o estudantado popular que non vai poder cumprir cos prazos que están marcando o Ministerio. Hai moitos estudantes que están na casa coidando de familiares, con problemas de saúde mental, sen recursos telemáticos para estudar,  ou estudantes que teñen que traballar en supermercados e hoxe lles están metendo moitísimas horas, ademais da dificultade de traballar neste contexto.

Hai marxe para que as diferentes organizacións estudantís faledes e cheguedes a unha postura intermedia común?
Oxalá, pero é moi complicado. ANEGA está actuando de xeito unilateral, ademais nós non queremos participar con eles polos casos de agresión sexual que tiveron, e que non resolveran dun bo xeito. Ademais está formulando a súa loita cun fondo político que non nos convence e non nos parece bo para as clases máis baixas.