Educación
ANEGA convoca folga estudantil durante o estado de alarma

Pasou máis dun mes dende a suspensión das aulas presenciais por mor da crise sanitaria. Trinta e cinco días despois, as estudantes continúan sen saber como rematará o curso, como será a avaliación ou que pasará coas que non teñen os medios ou as condicións axeitadas para seguir co traballo a distancia. A palabra ‘folga’ comezou a soar timidamente na última semana, para rematar estoupando tras o enfado xeralizado coas reitorías das tres universidades galegas.

O pasado martes, horas antes de que o sindicato estudantil ANEGA convocara unha folga indefinida a nivel nacional, a Asemblea Aberta da Facultade de Comunicación da USC foi a primeira en dar o paso. Chamou a unha folga dunha semana, comezando hoxe mesmo, e con posibilidade de prórroga. Pablo Calviño, membro da Asemblea e alumno titor da Facultade aclara que sempre reivindicaron que queren seguir coa súa formación, pero rexeitan a avaliación nestas condicións, polo que “se ven obrigados a renunciar a aprender para conseguir facerse valer.”

A folga durante a corentena consistirá en non asistir ás sesións de docencia telemática nin participar nos exames ou nas entregas de traballos que se esixan desde a universidade"

E cabe preguntarse, como é unha folga durante unha corentena? A responsable de Relacións Sociopolíticas de ANEGA, Ana Fidalgo, explica que a primeira folga telemática consistirá en “non asistir ás sesións de docencia online nin participar nos exames ou nas entregas de traballos que se esixan desde a universidade”. Ademais, dende pasado luns estanse a levar a cabo ocupacións virtuais da Reitoría da USC, que se expandiron ás universidades da Coruña e de Vigo. Realízase mediante o envío masivo de correos electrónicos aos reitores, nos que as estudantes expoñen as súas queixas, todos os días á unha do mediodía.

Un sector do estudantado participa dun xeito particular na folga: as estudantes que non teñen unha conexión a internet óptima ou o equipo material necesario. Josema Loureiro estuda xornalismo e está a pasar o confinamento na casa dos seus avós, ambos dependentes. Explica que a cuestión do internet no rural é “unha batalla perdida” e que, malia que a maioría dos seus profesores fan o posible por axudalo, “o desleixo do equipo decanal coa situación é total”. Di participar na folga “de xeito pasivo”.

Pablo Calviño remarca o carácter solidario da folga, xa que permite aos alumnos con máis dificultades “ter amparo para non entregar traballos nin participar noutras tarefas avaliables”. Ana Fidalgo tamén apunta esta acción coma medida de presión que “deixa de lado as lóxicas de produtividade e competitividade”.  Engade que “cómpre concienciar de que non se trata dunha cuestión de beneficio individual, senón de apoiar ás compañeiras que non se atopan nunha boa situación de cara ás avaliacións, ademais dunha medida de presión á hora de resolver o destino do curso”.

A convocatoria impide que se penalice ás estudantes que a secunden, e que estas sexan avaliadas durante a duración do paro académico

O dereito a folga está garantido tamén durante o estado de alarma, recollido no Regulamento de Estudantes e no Estatuto del Estudiante Universitario. A convocatoria da folga impide que se penalice ás estudantes que a secunden, e que estas sexan avaliadas durante a duración do paro académico. Ademais, Pablo Calviño lembra do Estatuto do Estudantado da USC, aprobado este curso no Claustro da universidade, cuxo Artigo 39 protexe ás participantes nas folgas convocadas dende unha asociación inscrita no Rexistro de asociacións da USC.

A ORIXE DA CONFRONTACIÓN: FALTA DE INFORMACIÓN E NEGOCIACIÓNS FRUSTRADAS

Representantes da Asemblea Aberta de Comunicación xuntáronse telematicamente, o pasado luns 13 de abril co decanato da Facultade. Pablo Calviño,  un deses representantes, resume as conversas desa xuntanza: “Logo de tres horas de xuntanza non houbo nin unha soa cesión”. Foi esta polarización entre as posturas do estudantado e do decanato o que fixo que a asemblea, que nun comezo tiña carácter informativo, rematase converténdose nun comité de folga. 

Tras isto, a mesma agrupación de estudantes reuniuse o pasado martes 14 co obxectivo de que as representantes transmitiran o acontecido durante a reunión que mantiveran co equipo decanal. 

Experiencias similares están a ter lugar en moitas outras facultades galegas, como é o caso da de Informática da UDC. Xaime Pardal, pertence a esta asemblea a explica que tras reunirse telematicamente elaboraron un documento que propuña a suspensión do curso ou, como segunda opción, a avaliación por traballos. “O documento foi enviado ao decanato sen resposta deste”, explica. “Por moitas propostas que facemos somos ignorados, polo tanto a folga é a única opción”.

Os reitorados galegos preferiron dirixirse á prensa antes que á comunidade universitaria a través das canles establecidas”

O malestar do estudantado galego non só provén das negociacións frustradas: a falta de información e a demora na toma de decisións por parte das autoridades universitarias son as queixas máis estendidas. Emilio Silveira é estudante de economía da Universidade de Vigo e amosa o seu descontento coa Reitoría, á que acusa de actuar maneira “unilateral”. Os reitores da UVigo, USC e da UDC comunicaron nova información a través de distintos xornáis locais. Ana Fidalgo critica o “total desleixo dos reitorados galegos co alumnado, preferindo dirixirse á prensa antes que á comunidade universitaria a través das canles establecidas”. 

Porén, a convocatoria de folga da Asemblea de Comunicación si tivo resposta oficial. Nun comunicado aos alumnos, o Decanato chamou á reflexión “sobre a actitude a tomar e que o fagan con toda a valentía”. Tamén amosou o “convencemento de que alguén quere aproveitar esta dramática situación para outro tipo de fins que exceden o puramente académico”. Calviño, lamenta a postura da dirección universitaria e explica que se o decanato ten coñecemento de algún tipo de interese deshonesto por parte das estudantes “debería facelo público e denuncialo”. Por iso, reitera a que a dirección da Facultade se sume “á beira do sentido común, na que defendemos un ensino de calidade e para todas”.

A SUSPENSIÓN DO CURSO ENRIBA DA MESA

A solución que o estudantado reivindica para atallar a situación actual é a suspensión do curso e a superación das materias que estaban a seren impartidas no momento do inicio do estado de alarma, sen que estas computen para o conxunto da media académica. Mais, tamén estipulan obxectivos concretos que son, segundo explica Ana Fidalgo, “que se modifique a resolución reitoral da UVigo que decreta a avaliación continua e os exames telemáticos, así como evitar que se saquen resolucións semellantes na USC e na UDC”.

A reivindicación vese apoiada por unha enquisa na que participaron máis de 5000 universitarias galegas. Das cales, o 56,5% apoiou a liquidación do curso nestes termos. A porcentaxe restante foi moi repartida entre outras opcións como a realización de exames en xullo, telemáticamente ou a repetición das materias o vindeiro curso. 

Reinventar a vivenda despois do andazo

Iago Lestegás

2

Derecho a la vivienda

Reinventar a vivenda despois do andazo

Iago Lestegás

2

A crise está evidenciando as desigualdades que existen en relación coa vivenda.