O Salto Galiza
Medios cooperando como alternativa ao xornalismo competitivo

Galiza Ano Cero, La Directa, Nós Televisión, La Marea, Argia, Ahötsa, Pikara, Soberanía Alimentaria, La Poderío... son algunhas das cabeceiras coas que cooperamos actualmente. Fixémolo con moitas outros medios e iniciativas e farémolo con máis no futuro; o xornalismo autoxestionado e de base militante non é un camiño sinxelo. Moitos medios son de carácter territorial e temáticos moi diversos: algúns xeralistas, outros especializados, algúns con diferentes nodos na península e outros máis locais. Con todos eles compartimos unha filosofía de base común e unha visión do xornalismo como ferramenta para dar voz ás propostas transformadoras e para fiscalizar aos poderes políticos e económicos. Como é lóxico, cada quen cos seus matices, unha diversidade que respectamos e nos enriquece.

Nun modelo de negocio no que prima a competitividade ou ver quen obtén máis clics, axudarnos uns a outros reforza a visión dun xornalismo que concibe a información como un ben común e non unha mera mercancía

Con todos os medios de comunicación afíns compartimos aquelas publicacións que poden ser de interese para as nosas lectoras e que nos permiten, con esta fórmula, chegar a territorios e ámbitos temáticos que cos nosos medios e base de colaboradoras, quizais non poderiamos acadar. Tamén, na medida en que as rutinas de traballo o permiten, cooperamos uns con outros compartindo fontes, ideas e informacións, e tamén impulsamos traballos conxuntos que se difunden conxuntamente.

Nun modelo de negocio no que prima a competitividade, chegar antes que o outro, ver quen ten máis visitas e quen obtén máis clics, axudarnos uns a outros a difundir contidos reforza a visión conxunta dun xornalismo que concibe a información como un ben común e non unha mera mercancía; que entende as historias que conta como unha realidade de interese xeral que é importante que chegue a cantas máis lectoras mellor, e non como un produto de propiedade exclusiva.

En momentos difíciles como no que estamos, queremos visibilizar máis que nunca esta rede de medios afíns que nos enriquece e invitarvos a leerlos, seguilos e apoialos. Por moitas máis iniciativas de xornalismo polo apoio mutuo.