Sergas
O Colexio de Médicos de Ourense consegue que o Sergas rectifique a discriminación salarial das médicas embarazadas

A pesar das continuas sentenzas na súa contra ao longo dos anos, o Sergas segue sen pagar a proporcional das gardas na baixa maternal ás súas traballadoras sanitarias. Esta realidade, que ademais está recollida na lei 9/2017 do 27 de decembro na que “se garante a percepción polo persoal estatutario do Servizo Galego de Saúde, durante as situacións de maternidade, paternidade, risco durante o embarazo e risco durante a lactancia natural, así como durante todo o período de duración dos permisos [...] da totalidade das retribucións básicas e complementarias fixas [...] e variables”, segue levando a moitas profesionais do sector aos xulgados.

Unha situación que se repite desde hai anos

“O que denunciamos é o feito de que ás mulleres, mentres estamos en activo e realizamos gardas temos un salario, que é parte soldo base e parte as gardas que facemos”, conta Carmen Varillas, vicepresidente do Colexio de Médicos de Ourense. “Porén, en situación de permiso por exención de gardas debido ao embarazo, o Sergas ata agora non facía a compensación do equivalente que se facía polo xeral polos meses previos nin coas gardas, co cal existía un agravio comparativo desde o punto de vista económico naquelas mulleres que, debido á situación de embarazo non podían realizar gardas o non era bo que as realizasen”, explica Varillas.

Entendendo que esta falta de ingresos durante os meses de embarazo e lactancia implican unha “perda de poder adquisitivo coa situación da maternidade” para estas profesionais do sistema sanitario, o Colexio de Médicos de Ourense decidiu que quería axudar a estas traballadoras a denunciar esta situación que entendían de discriminación. Algunhas das persoas membros da nova xunta directiva viviran situacións de desigualdade nos anos anteriores. “Por iso nos pareceu oportuno actuar”, continúa Varillas.

Deste xeito, o Colexio de Médicos de Ourense puxo ao “servizo das colexiadas e colexiados o servizo de asesoría xurídica do Colexio, tanto para as mulleres que deixan de facer gardas por motivo do embarazo, como durante a prestación de maternidade e de paternidade, onde tamén lles pasa un pouco o mesmo”. Para evitar que cada persoa tivera que denunciar “de xeito individual”, tendo que facerse cargo dos gastos pola súa propia conta. “Xa que o Sergas non se estaba a facer responsable, a nós como Colexio si nos parecía importante que a xente colexiada tivesen esa defensa”, prosegue Varillas.  “Eu creo que, o feito de que non se faga por parte de mais colexios e entidades, é unha cuestión de falta de perspectiva sobre conciliación”.

Algunhas das persoas membras da nova xunta directiva viviran situacións de desigualdade nos anos anteriores. “Por iso nos pareceu oportuno actuar”, continúa Varillas

Tras o último fallo a favor de varias traballadoras na mesma situación por parte do TXSG, grazas en parte ás denuncias por parte do Colexio profesional de Ourense, o Sergas asegura que terá en conta a petición a través dunha modificación na lei de acompañamento aos presupostos de Galiza 2021. Con todo, segundo Varillas, aínda “non ten constancia de ningunha traballadora que solicitase a exención de gardas, se están a facer o abono da parte proporcional das gardas directamente ou se seguen na mesma tónica dos últimos anos”.

A importancia da conciliación tamén no colectivo médico

“Creo que como Colexio nos si que estamos posicionados nese recoñecemento que terían que facer as administracións nalgún momento sobre a importancia de facilitar a conciliación no noso colectivo”, engade a vicepresidenta do Colexio de Médicos ourensán. “Non sei se é que no noso sector agora mesmo somos maioritariamente mulleres, ou é un cambio xeracional, porque tamén  mais penso que cada vez máis temos máis presente a importancia de combinar as dúas facetas”, continúa.

Para ela, como para outras profesionais é hora de pór sobre a mesa “a necesidade de reflexionar en estratexias que poidan facilitar a conciliación das médicas e médicos coa súa vida profesional e persoal, sobre todo cando fan quendas de vinte catro horas”. Ademais, Carmen Varillas entende que na situación de diminución acusada da natalidade que se está dando en Galiza nos últimos anos, non ten sentido que se diminúa os salarios das traballadoras precisamente cando quedan embarazadas.

“Como xinecóloga son consciente dos problemas de natalidade que imos ter, mais mentres as responsabilidades públicas e os gobernos non cumprimenten medidas que faciliten que a xente poida traballar e ter fillos, esa realidade non se vai poder dar”, explica Varillas.  “Por iso é importante falar disto desde o punto de vista sociolóxico, non só desde a miña visión como traballadora sanitaria”.