El Salto Radio
Etxebizitza gaiari helduz hasiko da Lanaren Ekonomia irratsaioaren 8. denboraldia

2024-25 sasoiari ongietorria emateko ordua iritsi da. 2018an hasitako bideari jarraiki, ekonomiaren inguruko gaiak izango ditugu hizpide Lanaren Ekonomia saioan. Mundua eraldatzeko lehen pausua mundu horren errealitatea aztertzea, ulertzea eta azaltzea denez, zeregin horretan zentratuko gara. Ekintzarik gabeko analisiak bihotzik gabeko buruak diren bezala, analisirik gabeko ekintzak bururik ez duten bihotzak dira. Bata eta bestea ezinbestekoak dira gaur egungo agertokian.

Horrexergatik, Lanaren Ekonomiak langileen ikuspegitik jorratutako analisi kritikoak zabaltzea du helburu, egungo langile borrokak eta gatazkak abiapuntutzat hartuta. Klase ikuspegia eta gehiengo zapalduaren bizipena oinarrian izanda, ekonomia gaiak jorratzen eta ulertarazten arituko gara, Bilbo Hiria irratia, Hordago, El Salto Radio, Argia eta Arrosa sarean arteko elkarlanari esker.

Egungo langile borrokak abiapuntutzat hartuta, ekonomia gaiak jorratuko ditugu Bilbo Hiria, Hordago, El Salto Radio, Argia eta Arrosa sarean arteko elkarlanari esker.

Lan arlotik haratago, gure bizitza zeharkatzen duten beste eremu batzuk ere jorratuko ditugu: zerga politika, etxebizitza, aurrekontuak, indar korporatibo globalen gorabeherak, zaintza esparruko borrokak… asko dira urte hauetan zehar egin ditugun erreportai, elkarrizketa eta albisteak. Filosofia horrekin lanean jarraitzeko asmoa daukagu.

Lehenengo saioa azaroaren 15ean izango da, 18:00tan, eta etxebizitzaren gatazkari buruz arituko gara. Gure sindikalagenda berraktibatuz, asteko deialdi sozialen eta borroka sindikalen berri emateko, saio honetarako hiru elkarrizketa izango ditugu. Hasteko, Etxebizitza Sindikatu Sozialistaren bozeramailea den Karla Pisanorekin hitz egingo dugu, gatazkaren norabidearen eta Abenduaren 14rako antolatu duten manifestazioaren inguruan. Ostean, Miguel Virizuela ekonomialari eta Hordago eta El Saltoko Kolektibo Editoreetako kidearekin solastuko gara, Euskal Herriko etxebizitza eskubidearen aldeko azterketa egiteko. Saioa bukatzeko, eta ohikoa den bezala, Argia atala izango dugu, Jon Torner kazetariak Nafarroan eta Euskal Herri kontinentalean gune tentsionatuak izendatzeko politika berriak aztertzeko, alokairuen prezioak mugatzeko helburua dutena. Hurrengo saioak politika industrialak (Azaroaren 28an) eta euskal aurrekontu publikoak (Abenduaren 12) aztertzeko izango dira.

Analisi kolektiboa plazaratzen jarraituko dugu, bi barikutan behin, arratsaldeko 18:00tan, eta betiko lez Bilbo Hiria, El Salto Radio eta Arrosa sareko hainbat irratiek emango dute

Lanaren Ekonomiaren 8. denboraldi honetan, eta 120 saio baino gehiagoko ekarpena egin eta gero, uhinetan analisi kolektiboa plazaratzen jarraituko dugu, bi eguenetan behin, arratsaldeko 18:00tan, eta betiko legez Bilbo Hiria, El Salto Radio eta Arrosa sareko hainbat irratiek emango dute. Aurtengo nobebadea dakargun sintonia berria da, berriro ere Maisha MC-k egindako opariari esker, eta gai berriak, kolaboratzaile berriak eta ilusio berriak dakartzagu baita. Aspalditik gatoz eta urrutira goaz. Ongi etorri Lanaren Ekonomia saiora!