Contaminación
A calidade do aire na contorna dos colexios de Vigo incumpre por moito os parámetros esixidos pola OMS

Ecoloxistas en Acción vén de facer público un amplo estudo sobre os niveis de dióxido de nitróxeno (NO2) nas contornas de 160 centros educativos de seis cidades de toda España para valorar a calidade do aire que respiran as estudantes. As cidades escollidas foron Barcelona, Madrid, Granada, Murcia, Vigo e Xixón e soamente as medicións nunha das contornas dos centros analizados estiveron abaixo do límite de 10 µg/m3 (microgramos por metro cúbico) de NO2 de media que esixe a Organización Mundial da Saúde. Vigo suspende por moito o que recomenda a OMS.

Veleno na auga da billa: a contaminación que non cesa na zona cero das macrogranxas en Galiza

Javier H. Rodríguez

Medio ambiente

Medio ambiente Veleno na auga da billa: a contaminación que non cesa na zona cero das macrogranxas en Galiza

Javier H. Rodríguez

O último informe da Rede Cidadá organizada por Greenpeace sinala que o 97,5% de acuíferos analizados na Limia conteñen nitratos en proporcións alarmantes

Aínda que a situación é algo mellor que en Madrid e Barcelona, ningún dos centros analizados cumpre coas indicacións da OMS. Analizáronse 18 espazos moi próximos a centros escolares e deles só tres –é dicir, un de cada seis– estará a respirar menos de 20 µg/m3, o valor proposto pola Comisión Europea na revisión da directiva de calidade do aire como media anual. Un dos colexios analizados chegou a superar os 40 µg/m3, o límite legal actualmente vixente. Trátase precisamente dun centro de educación primaria, en cuxas inmediacións hai un aparcadoiro de coches, outro de motos e unha gasolineira.

Para o estudo seleccionaron centros de educación primaria e secundaria situados tanto en vías con alta densidade de tráfico como en contornas afastadas de vías de alta capacidade e con pouca exposición aos contaminantes emitidos polos vehículos. E os resultados, con todo, foron igualmente negativos. Mediron tamén os niveis de NO2 xunto ás estacións oficiais de control da contaminación, coa finalidade de calibrar os aparellos instalados nos colexios. En total, os integrantes de Ecoloxistas en Acción colocaron 340 captadores pasivos nun total de 170 localizacións de todo o Estado español.

“Debemos lembrar que a poboación infantil é especialmente sensible á contaminación atmosférica, debido á súa elevada frecuencia respiratoria, á súa maior exposición no ambiente exterior e á inmadurez dos seus sistemas respiratorio e inmunitario, sendo o NO2 un activo inmunodepresor”, sinalan desde a organización ecoloxista. E engaden: “Resulta necesaria unha substancial mellora da información sobre a calidade do aire que respiramos, en particular na contorna dos centros educativos e outros centros sensibles (asistenciais, deportivos e sanitarios), complementando a proporcionada polas estacións oficiais de medición con mapas de distribución e con campañas de medición específicas”.