Movimiento BDS
“Comprando produtos israelís es cómplice da ocupación, o apartheid e os asasinatos”

Ribal Alkurdi é un refuxiado palestino que vive no campo de Aida, en Belén. Alí participa nunha organización local que ten como finalidade crear conciencia entre a sociedade palestina sobre o que supón a ocupación israelí e tamén sobre a importancia do movemento de Boicot, Desinvestimento e Sancións ao Estado de Israel.

Cales son as principais actividades que levades a cabo na vosa organización?
A nosa principal misión é a de crear consciencia sobre as consecuencias da ocupación na vida das persoas palestinas. Cremos que é fundamental que todo o mundo coñeza a súa historia para tentar, deste xeito, poder actuar e resistir a ocupación. Para isto creamos campañas artísticas, obras de teatro… En definitiva, actividades que contan a nosa historia accesibles a público de todas as idades.

É doado boicotear produtos israelís dende Palestina?
Non. É moi difícil: a maioría dos bens que necesitamos están controlados por Israel. De feito, case todas as familias palestinas consumen produtos israelís no seu día a día; non nos queda outra opción.

Entón, en que se centra o movemento de BDS en Palestina?
O máis importante para nós é crear unha cultura de BDS entre a poboación. Isto significa que os nenos e nenas da rúa teñen que entender, por exemplo, que nós podemos consumir esta auga, pero tamén teñen que saber que esta auga está controlada por Israel. Queremos explicarlles que, aínda que agora non nos quede máis remedio, se no futuro podemos comprar produtos que veñan de calquera outro sitio, temos que facelo antes de apoiar a economía israelí.

O máis importante para nós é crear unha cultura de BDS entre a poboación.

Apoia a Autoridade Palestina o BDS?
Non. Os líderes da Autoridade Palestina din que si que apoian o BDS pero a realidade é que non. Temos que ser conscientes de que cando falamos da Autoridade Palestina estamos falando tamén dos Acordos de Oslo, nos que se asinou que Cisxordania estaría dividida en tres áreas: A (control total palestino), B (control civil palestino e militar israelí) e C (control total israelí). Aínda que isto é o que se estableceu, a realidade é que a área A non existe. O goberno da ocupación israelí entra en calquera parte do territorio palestino cando lle vén en gana. A Autoridade Palestina protexe o goberno israelí.

E, a nivel internacional, que pode facer o BDS?
Dende Palestina non podemos facer moita cousa, pero no estranxeiro tendes a oportunidade de escoller comprar produtos que non sexan israelís: hai centos de opcións dispoñibles. A xente de arredor do mundo debería visitar Palestina e ver cos seus propios ollos o que supón a ocupación para así, despois, trasladar a nosa situación aos seus países de orixe e crear conciencia sobre a importancia do boicot a Israel. Por outra banda, necesitamos traballar para que os gobernos tamén se sumen á campaña de BDS.

A xente debería visitar Palestina e ver cos seus propios ollos o que supón a ocupación para así, despois, trasladar a nosa situación aos seus países de orixe e crear conciencia sobre a importancia do boicot a Israel.

O máis importante é crear conciencia de que a través da compra de produtos israelís se está sendo cómplice da ocupación, do apartheid, dos asasinatos de nenos e nenas na rúa, dos límites de movemento, etc.