Pobreza
Máis de ano e medio de acampada en busca dun teito

Diversos colectivos sociais xunto a moitas das persoas sen teito da cidade de Vigo acampan na Praza do Rei, diante do Concello, desde o 17 de febreiro de 2017. Fano en sinal de protesta pola administración dos albergues da cidade. No pasado mes de agosto cumpriuse ano e medio de acampada desde que empezou a protesta.

“Quen dorme na rúa é porque non quere durmir no albergue” afirmou o alcalde de Vigo, Abel Caballero, en 2015 en resposta a Serafín Otero do BNG. O nacionalista acusara ao alcalde de “falta de sensibilidade” ante a situación dos sen teito na cidade olívica. Juan Miguel Carollo, un dos principais organizadores e membro da acampada asegura que un dos obxectivos é “desmentir as declaracións do alcalde: a xente non dorme na rúa porque queira”. Buscan tamén “mellorar os servizos sociais da cidade”.

O Concello de Vigo só gasta 42,43 euros por persoa ao ano en investimento social, por debaixo dos 60 euros da media estatal

O certo é que segundo a Asociación de Directoras e Xerentes de Servizos Sociais, o Concello de Vigo só gasta 42,43 euros por persoa ao ano en investimento social. Está por debaixo dos 60 euros da media estatal e dos máis de 100 euros anuais que gastan concellos punteiros en prestacións sociais dentro do Estado español, como os de Zaragoza ou As Palmas.

O propio Abel Caballero chegou a afirmar nunha entrevista para un xornal que “a oficina antidesafiuzamentos é a miña mesa. Chamo eu ao banco e pároos”. Mais, segundo os datos da Oficina de Notificacións e Embargos, Vigo soporta máis dun desafiuzamento ao día desde o ano 2010. No ano pasado, rexistráronse un total de 528 desaloxos na cidade.

A REALIDADE DOS SEN TEITO NA CIDADE

En Vigo funcionan dous albergues para darlles refuxio ás máis de 200 persoas na rúa. Un é o dos Hermanos Misioneros Pobres de Teis, cunha concesión de 114.000 euros por parte do propio Concello, e o outro é o Albergue Municipal da cidade, xestionado pola Cruz Vermella e cunha subvención de 830.000 euros. 

En ambos os casos, a estadía é limitada. No de Teis, un pode ficar un máximo de 10 días, mais debe pasar un mes para poder volver. No Municipal –na rúa Marqués de Valterra– un pode estar tamén ata 10 días, pero tras ese período de tempo, debe abandonalo ata que pasen outros 10 días. Polo tanto, o que sexa capaz de combinar as estadías de ambos albergues, durmirá na rúa coma mínimo durante 10 días.

O que fan desde a acampada do Concello é ir ás portas dos albergues á última hora –entre as 21.30 e as 22.00 horas– e recoller a quen queda fóra. Os organizadores tamén proporcionan comida de forma solidaria a quen vaia.
Dentro das “irregularidades” da administración dos albergues critican a función “equipo de rúa”, encargado de mediar entre os sen teito e o resto de cidadáns. Aseguran os compoñentes da acampada que “apenas actúan: se o fixesen ben non habería os problemas que hai na rúa Torrecedeira”.

Estímase que –coma pouco– hai entre 200 e 300 persoas na rúa en Vigo a día de hoxe

No caso dos sen teito, e por mor das diversas causas polas que un queda na rúa, a integración social considérase algo primordial. Ningún dos albergues ten equipos de psicólogos ou orientadores sociais. Asegura Juan Carollo que “a xente quere reintegrarse na sociedade, mais tampouco se lles facilita facelo. A axuda psicolóxica é importantísima”. Aínda que non conseguiron os seus obxectivos, os compoñentes da acampada continúan a súa loita. Juan confesa que buscan tamén falar co propio Abel Caballero para “describirlle a realidade do que están pasando moitos dos seus cidadáns e que isto cambie”.

Estímase que –coma pouco– hai entre 200 e 300 persoas na rúa en Vigo a día de hoxe. Pese a que haxa xente de todas as idades sen teito, o Concello parece seguir a preocuparse máis da estética da cidade que da xente que a habita. Así, se no ano 2017 investiu 636.000 euros en iluminación de Nadal, este 2018 supérase contando cun orzamento de máis de 2,3 millóns de euros para os próximos 3 anos. Isto supón un mínimo dun aumento de 130.000 euros ao ano na decoración de Nadal. O orzamento da iluminación case acada o orzamento anual do albergue da Cruz Vermella, mais segundo o alcalde “Vigo terá as mellores luces de Nadal do mundo”, como afirmou nunha pasada rolda de prensa.