LGTBIfobia
A Fiscalía ve homofobia no asasinato de Samuel Luiz e pide penas de 22 a 27 anos de cárcere

A Fiscalía imputa aos cinco acusados maiores de idade do crime de Samuel Luiz, o mozo de 24 anos que morreu asasinado na Coruña na madrugada do 3 de xullo de 2021 despois de sufrir unha brutal malleira no paseo marítimo da cidade. Segundo o escrito de cualificación fiscal, atribúeselles unha “crueldade extrema” coa intención de provocar a súa morte.

En particular, enfócase na reacción “moito máis virulenta” dun dos procesados ao interpretar que a vítima “era homosexual”. O Ministerio Público recolle as palabras do acusado: “Voute apuñalar, vas morrer”, que foron pronunciadas mentres continuaba golpeando a Samuel con puñadas e patadas. Ademais, sinala que na persecución que culminou na morte do xoven coruñés, participaron tódolos acusados, incluíndo catro homes e unha muller, así como dous menores de idade que xa foron condenados e están a cumprir a súa condena nun centro de menores.

O escrito da Fiscalía fai fincapé nos últimos momentos da agresión, onde parte dos acusados golpeaba a Samuel mentres os demais o rodeaban para asegurar o ataque e evitar calquera axuda externa.

A Fiscalía da Coruña solicita agora penas de entre 22 e 27 anos de prisión para todos, considerándoos coautores dun asasinato con aleivosía e ensañamiento, coa agravante de discriminación pola orientación sexual da vítima. Para dous dos acusados que participaron inicialmente na agresión, pídese unha pena de 25 anos de cárcere, mentres que para os outros tres solicítanse 22 anos de prisión. Ademais, a un deles impútaselle un roubo con violencia pola subtracción do móbil de Samuel, polo que se lle pide unha pena adicional de cinco anos máis de cárcere.

A investigación sobre a agresión homófoba

Segundo as investigacións realizadas tralos acontecementos e o que se relata no escrito da Fiscalía, os feitos comezaron pouco antes das tres da mañá cando Samuel estaba a realizar unha videochamada cunha amiga á saída dun pub na zona da praia coruñesa de Riazor. Nese momento, un dos acusados, que estivera no mesmo establecemento, aproximouse a Samuel de maneira “agresiva” e pediulle que deixase de gravalos.

Samuel respondeu que simplemente estaba a facer unha videochamada, pero a Fiscalía sostén que o acusado, baseándose nas palabras, xestos, vestimenta, ton de voz e aparencia física de Samuel, “interpretou que era homosexual”, o que, segundo relata, provocou unha reacción aínda máis violenta por parte do acusado debido á súa aversión á orientación sexual homosexual. Chegou a ameazar a Samuel dicindo: “Deixa de gravar a ver se che vou a matar maricón”.

Despois, de maneira repentina e coa intención de causar a morte, o acusado abalanzouse sobre Samuel, golpeándoo principalmente na cabeza e a cara con puñadas e patadas. A Fiscalía sinala que o acusado era plenamente consciente do alto risco que esta violenta acción representaba para a vida de Samuel. Un amigo uniuse á agresión, sendo plenamente consciente da brutalidade da acción, derrubando a Samuel ao chan e suxeitándoo fortemente polo pescozo.

En cuestión de segundos, un grupo numeroso de persoas que se atopaban preto uniuse á agresión co único propósito de golpear a Samuel

Segundo o relato do Ministerio público, a única muller acusada nestes feitos, tamén consciente da animadversión do agresor cara á homosexualidade, participou activamente no ataque asegurándose de que ninguén axudase á vítima e apartando á amiga de Samuel que pedía que se detivesen. En cuestión de segundos, un grupo numeroso de persoas que se atopaban preto uniuse á agresión co único propósito de golpear a Samuel coa intención de privarlle da vida ou polo menos sendo conscientes de que isto podería suceder.

A Fiscalía describe que os golpes continuos e brutais tiñan a intención deliberada de aumentar o sufrimento físico de Samuel co obxectivo de causar a súa morte, o que reflicte unha extrema crueldade e deshumanización. A agresión mantívose a pesar de que os agresores sabían que Samuel non tiña ningunha posibilidade de reaccionar.

Posteriormente, os implicados reuníronse no parque Europa, onde insultaron a Samuel chamándoo “maricón”. Samuel faleceu horas despois no complexo hospitalario da Coruña (CHUAC) debido ás múltiples lesións sufridas. Estes feitos están á espera de fixar unha data de xuízo, xa que tódalas partes deben presentar os seus escritos de defensa ou acusación. Tanto a familia de Samuel como o colectivo LGTBI ALAS Coruña acudiron como acusación particular e popular neste caso.