We can't find the internet
Attempting to reconnect
Something went wrong!
Hang in there while we get back on track
Culturas
Ireki ditu ateak Durangoko Azokaren 57.aldiak
![Durangoko Azoka 1](/uploads/fotos/r2000/a2becaf4/Durango.jpg?v=63837678461)
Bi urteko ezohiko azokaren ostean Durangoko liburu eta disko azokak bere ohiko formatua berreskuratu du. Atzo goizeko 10:30etan normaltasunez ireki zituzten ateak eta egin zuen eztanDA! Datozen egunetan jendez mukuru beteko dira pasilloak, sinadurekin tintaz hustuko dituzte sortzaileek boligrafoak eta euskal kulturaz betetako poltsak aterako dira erosleen eskuetan Landako gunetik.
Gune bat baino gehiago ditu Durangoko Azokak. Landakoko salmenta postuez gain, Musikaren plaza, Ahotsenea, Irudienea, Szenatokia, Saguganbara, Talaia eta Kabiak osatzen dute azoka hain zuzen eta gune bakoitzak bost eguneko etengabeko egitaraua prestatu du. Ohiko aforoak berreskuratuta orotara 250 emanaldi baino gehiago antolatu dituzte euskal kulturaren eztanDa! izan dadin.
Ikasle goiza eta Gazte eztanDA!
Ikasleei eskainitako goiza izan ohi da lehenengo eguna eta hala egin zuten atzo ere. Bi urteren ostean, Euskal Herriko 1.500 ikasle izan ziren protagonista Landakon, bertan ibili ziren liburuak eta diskoak kuxkuxeatzen. Halaber, guneek antolaturiko tailerretan parte hartzeko aukera ere izan zuten ikasleek zein hezitzaileek. Horrez gain, bihar, ostirala, lehen aldiz Gazte eztanDA! ospatuko da. Gazteei zuzendutako egitarau propioa. Egunean zehar azokako gune guztietan jarduera bereziak antolatu dituzte. 14:00etan gazte-bazkaria egongo da (norberak eraman beharko du jatekoa), 17:00etan EuskarAbenturak antolaturiko jinkana batean parte hartu ahalko dute Euskal Herriko gazteek eta eguna bukatzeko 19:00etan ElektroPottotte eta OstiKda taldeen eskutik elektrotxaranga jaia egongo da Durangon.
Azoka digitala
Pandemia zela eta azokarik egin ezin izan zen urtean, azoka digitala sortu zuen Gerediaga elkarteak. Ordutik eutsi egiten diote eta azoka egunetan -aurten abenduaren 7tik 10era- erakusmahaietan salgai egoteaz gain Durangoko Azokako nobedadeak online erosteko aukera ere badago webgunean. Horrez gain, behin azoka bukatuta, abenduaren 12tik aurrera ‘Zu non, han da!’ proiektua abiatuko dute. Euskal Herriko ehun bat liburu dendatan azokan salgai egon diren nobedadeak erosteko aukera egongo da. Aurten gainera, sortzaileek ere parte hartuko dute proiektu horretan, euren lanen aurkezpenak egingo dituzte liburudendetan.
![Durangoko Azoka](/uploads/fotos/r2000/325e09fc/photo_5801048495635937943_y.jpg?v=63837676774)
Durangora gerturatuko direnei garraio publikoan joateko gomendioa egin diete antolatzaileek. Hala ere, erraztasunak emate aldera, Landako gunea eta inguruko aparkalekuak lotzeko dohaineko autobus-lanzadera zerbitzua jarri du aurten ere Gerediaga Elkarteak. Hogei minuturo aterako dira.
Erakunde publiko, babesle pribatu eta azokan erakusmahaia jartzen duten partaideen ekarpenari esker egiten da batik bat, azoka. Hala, aurtengo aurrekontua 670.000 eurokoa dela zehaztu zuten. Eragin ekonomikoa bestalde, sei milioi eurotan kuantifikatzen dute. Siadeco etxearen datuei erreparatuz, azken urteotan 120.000 bisitari jasotzen ditu kulturaren plazak. Bi urte arraroren ostean ziurgabetasuna da nagusi eta datu horietara gerturatu nahi lukete antolatzaileek.
Hordago Durangon
Azokak 176 postu ditu Landakon eta horietatik 34 parte hartzaile lehen aldiz egongo dira bertan. Autoekoizleak 15 izango dira. Hordago – El Salto ere Durangoko Azokan egongo da egunotan. Goienkale kaleko 44. zenbakian duela zenbait egun argitaraturiko azken hilabetekaria eskuratu ahal izango da, baita aurrekoak ere. Horrez gain, poltsak eta kamisetak erosteko aukera egongo da, eta bertan harpidetza egiteko aukera ere.