Elecciones
Cachan a monxas e persoas sen identificar levando anciáns internos a votar en Cambados e Lugo

Non só pasou en Vigo. Durante a xornada electoral deste domingo, varias monxas e persoas sen identificar foron capturadas polas cámaras levando a votar a anciáns e anciás internas en dous asilos das localidades de Cambados (Pontevedra) e Lugo. Este último xa foi noticia no pasado, a última vez durante as eleccións xerais do 23 de xullo de 2023, cando tivo lugar unha incidencia semellante que mesmo chegou a ser denunciada de maneira formal. Segundo relatan as persoas que documentaron graficamente esta escena, no asilo das Hermanitas de los Ancianos Desamparados de Lugo, na céntrica rúa San Roque, o tránsito de monxas e outras personas non identificadas levando anciáns e anciás a votar non parou durante as primeiras horas da xornada electoral. De feito, nas imaxes que complementan este texto pódese apreciar como unha mesma persoa repite a viaxe unha de outra vez con diferentes electores e electoras de avanzada idade.

Ademais de en Lugo, onde a práctica coñecida popularmente como carretaxe xa parece unha constante neste lugar, foi documentado un caso semellante nun asilo de Cambados, nas Rías Baixas. Alí, segundo o relato das persoas que tiraron as fotografías, un par de coches estiveron realizando viaxes de ida e volta entre o asilo e os colexios electorais durante toda a mañá. Moitas das persoas maiores desplazadas presentaban evidentes problemas de mobilidade. Entre estas persoas, aínda non identificadas, había monxas da congregación que acompañaban a outros dos residentes internos coa papeleta na man.