Fronteras
Croacia: cando son os propios policías quen denuncian a violencia nas fronteiras

Un grupo anónimo de policías croatas admite nunha carta enviada a Defensora do Pobo os abusos cometidos contra as persoas refuxiadas que intentan entrar no país. O escrito fíxose público onte en el asegúrase que as ordes da dirección de policía son de “deportar a todo o mundo sen papeis, coller os seus cartos, romperlles os móbiles, tiralos ou quedárnolos para nós e, despois, devolver forzosamente aos refuxiados a Bosnia”.

Nunha entrevista recente cunha televisión suíza, Kolinda Grabar-Kitarović, presidenta de Croacia, dixo que, tras falar co ministro de interior, o xefe de policía e os axentes en terreo, non se utilizaba “unha forza excesiva” nas deportacións pero que “un pouco de forza si é necesaria” a hora de devolver aos migrantes a países lindeiros. Sen embargo, na carta enviada á Defensora do Pobo afírmase que todos os días chéganse a deportar a entre 20 e 30 migrantes, que as veces lles pegan e que inclusive algúns policías ata sacan as súas pistolas.

Na carta enviada á Defensora do Pobo afírmase que todos os días chéganse a deportar a entre 20 e 30 migrantes, que as veces lles pegan e que inclusive algúns policías ata sacan as súas pistolas.

Faysal, un mozo alxerino que intentou varias veces cruzar dende Serbia a Croacia, asegura que en máis dunha ocasión a policía croata descubriuno intentando entrar no país e lle propiciou varias malleiras. “Descubríronme escondido no tren, leváronme a estación de policía que está preto da fronteira serbia, tiráronme ao chan e estivéronme pegando durante 10 ou 15 minutos”, conta. Faysal apareceu despois de cinco horas camiñando ferido de volta en Sid (vila serbia fronteiriza con Croacia) coas costas e as pernas cheas de mazaduras.

O seu caso non é illado. Varias organizacións en terreo levan denunciando dende fai anos as actuacións policiais violentas contra refuxiados. Unha delas é No Name Kitchen, que conta con grupos de voluntarios en Sid (Serbia), Velika Kladusa (Bosnia) e Patras (Grecia). Enrico Pascatti, que se pasou oito meses en Sid traballando con esta organización e elaborando informes de violencia policial, asegura que as deportacións ilegais e violentas a Serbia por parte da policía croata son constantes. Ademais, segundo este activista, as forzas fronteirizas non só abusan fisicamente dos refuxiados, senón que tamén, as veces, recorren a humillación e a violencia psicolóxica. “Atopeime con casos de rapaces aos que obrigaron a estar nus durante horas, sobre todo en inverno. Unha vez un menor contoume que o forzaron a facer flexións en calzóns mentres lle pegaban nos pés cunha porra e o insultaban”, asegura.

Varias organizacións en terreo levan denunciando dende fai anos as actuacións policiais violentas contra refuxiados.

Ademais, segundo Enrico, é común que lles esnaquicen os móbiles, lles rouben os cartos e todas as súas pertenzas persoais. “Rómpenlles os teléfonos para que así, sen ter GPS, lles resulte moito máis complicado volver a intentar cruzar a fronteira”, explica. No Name Kitchen, xunto con outras asociacións en terreo, recompilan todos os informes de violencia policial recollidos por voluntarios na páxina web da organización Border Violence Monitoring.

Segundo un informe de Amnistía Internacional publicado o pasado mes de marzo, a Unión Europea “non solo fai ollos cegos ante os asaltos cometidos pola policía croata, senón que os financia”. Massimo Moratti, director de investigacións na Oficina Europea de Amnistía Internacional, explica en este informe que os fondos destinados á axuda humanitaria son moito máis pequenos que os dirixidos a equipar a policía fronteiriza croata. Ademais, Croacia está en proceso de entrar na área Schengen, caracterizada pola libre circulación dentro dos seus límites e polo endurecemento e peche de fronteiras a aqueles países que non están dentro do acordo. Exemplo desta visión son as vallas fronteirizas situadas no confín este de Hungría e na fronteira sur española. De acordo con estas políticas, o pasado mes de maio Davor Božino, Ministro de Interior de Croacia, cualificou a deportación colectiva de 70 migrantes a Bosnia como “unha acción en línea co estatuto de Schengen, dirixida a previr a inmigración ilegal”.

O grupo de policías anónimos autores do escrito declaran que toda a información publicada polos medios de comunicación con respecto a este tema “é certa e moi leve se a comparamos co que realmente acontece nas estacións de policía”. Por isto, piden á Defensora do Pobo croata que se involucre persoalmente para que estas “prácticas inhumanas” deixen de realizarse.