Editorial
O Salto deixa de publicar en X

A compra de Twitter por parte de Elon Musk en 2022 acelerou as peores tendencias dunha rede social que, xa antes da súa conversión en X, era o principal catalizador da deriva reaccionaria que se expande por todo o mundo. Como constataron outros diarios e miles de xornalistas, os beneficios de estar nesta rede foron cada vez máis escasos con respecto á deriva envelenada de participar nunha ferramenta na que a difusión dos discursos de odio medrou ao ritmo ao que o propio Musk se converteu na figura clave da extrema dereita internacional. Iso levou ao Salto a tomar a decisión de conxelar a nosa conta en X e non volver publicar nesta rede social.

O Salto é un medio de comunicación horizontal, unha cooperativa con método asembleario de decisións. O abandono de X prodúcese despois dunha discusión interna que nos levou varias semanas e que sucede a outras decisións previas, como reducir o nivel de atención que lle dedicamos a esta rede social no noso día a día e a renuncia á subscrición que nos permitía subir vídeos ao antigo Twitter.

No Salto debatemos moito sobre a necesidade de saír ou reducir a presenza en X e nas redes sociais propiedade dos oligarcas tecnofeudais de Silicon Valley

Desde o verán de 2024, cando se comprobou a capacidade de intervención de Musk a través de X en favor da campaña xenófoba contra a poboación migrante do Reino Unido, o equipo do Salto mantivo debates sobre a necesidade doutro ecosistema social, tanto de redes coma doutros mecanismos, que implicasen saír ou reducir a presenza en X e nas redes sociais controladas polos oligarcas tecnofeudais de Silicon Valley.

Entendemos que hai moitas contradicións no noso día a día. Que un proxecto como O Salto requira ferramentas de software propietario, o uso de teléfonos móbiles ou ordenadores portátiles e o consumo enerxético de manter unha web e unha rede de servidores —con custos ambientais e sociais elevados e de sobra coñecidos— ou o paradoxo de informar sobre a precariedade cobrando salarios só un pouco por riba do Salario Mínimo Interprofesional, son algunhas desas contradicións. Pero o feito de que teñamos que convivir con elas, é dicir, que sobrevivamos e desenvolvamos un proxecto comunicativo cunhas condicións marcadas polos mercados e o capital, non debe supoñer que todo valla. Hai límites que decidimos marcarnos e que definen o noso proxecto.

Deixamos de publicar en X para contribuír á derrota dos discursos de odio, para traballar noutros espazos de encontro coas nosas lectoras e lectores e combater a ofensiva reaccionaria que nos quere deixar sen resposta nin dereitos nin servizos públicos

Son límites que sinalamos desde o comezo do Salto, como non aceptar publicidade do Ibex 35, de empresas que contribúan ao cambio climático ou ao xenocidio, por exemplo, ou manter un único rango salarial, que obedece á estrutura non xerárquica da cooperativa que publica este medio. Eses límites autoimpostos fan deste proxecto un dos poucos medios que funcionan en Europa de forma asemblearia, grazas ao seu modelo de subscrición, sen hipotecas nin dependencia de ningunha empresa allea ao xornalismo. Chegou, así, o momento de impoñernos un novo límite que afecta, esta vez, á propia difusión dos nosos contidos.

Deixamos de publicar en X para contribuír á derrota dos discursos do odio, para traballar en espazos de encontro coa nosa comunidade de lectoras e lectores e seguir divulgando os nosos contidos e os nosos artigos co propósito firme de combater a ofensiva reaccionaria que asola o mundo e nos quere deixar sen resposta nin dereitos nin servizos públicos. Sabemos que quen están na primeira liña de defensa contra estas novas formas de fascismo, contra a desposesión e o xenocidio, nos atoparán noutras redes como Mastodon ou Bluesky, nos buscarán na nosa web e saberán seguir tecendo as complicidades que nos converten nun medio de referencia para os movementos sociais de transformación. Non temos medo desta decisión da que vos informamos hoxe porque, como dixo Gata Cattana, “nunca me sentín soa porque estabamos xuntas”.