Palestina
Petiscos para pedir o cese do apoio da USC a Israel

Ofrecen galletas, pinchos, café e folletos informativos sobre o papel da Universidade de Santiago de Compostela no apoio ao xenocidio palestino. Trátase dunha xornada de portas abertas, organizada pola Asemblea internacionalista do estudantado e da clase traballadora de Compostela, que terá lugar durante todo o día de hoxe no edificio da xerencia da USC.

“Seguimos loitando por que se firmen os nosos dezaseis puntos, e como do reitorado nos botaron, decidimos ir polo segundo edificio institucional por excelencia, que é a xerencia. Ademais que de aquí saen os cartos e é onde realmente se firman os contratos”, conta Isabel, unhas das voceiras da asemblea. “O certo é que xa tiñamos este plan de portas abertas, de ir con máis calma e deixando entrar as traballadoras, no reitorado. Pero como entrou a policía, non o puidemos levar ao cabo, así que agora estamos protestando aquí”.

Isabel está de pé, detrás dunha mesa cuberta por unha kufiya. Sobre ela, ademais da comida, hai pulseiras feitas con la coas cores da bandeira Palestina e máis folletos onde se pode ler “Free food for a free Palestine”. Fóra, as súas compañeiras ofrecen información ás persoas que pasan por diante do porta do edificio. Un deles para a un peregrino que rexeita o convite a entrar pero lles dá ánimos.

“É que temos os folletos en galego e inglés para informar tamén á xente que vén de fóra”, comenta Isabel. “E a nosa intención é precisamente que a xente entre. Ao único que lle impedimos a entrada é ao xerente. Que é como o reitor nas sombras e ademais parece ser que é bastante misóxino”.

Se están aquí hoxe, é pola falta de intención para dialogar en igualdade da USC, despois dun mes de mobilizacións e presións pacíficas.

Segundo as persoas que forman parte da asemblea, cando se lle impediu a entrada ao xerente, este decidiu tomar a parte polo todo e asegurou que se estaba impedindo o paso a todas as traballadoras, cousa que aseguran que non é certa.

“Repetímolo varias veces. Cando o xerente viu aínda non tiñamos unha voceira asignada e non quixo esperar a que decidiramos quen ía ser a persoa que falase. Dedicouse a dicir que non estabamos dispostas a dialogar con el e marchou”, denuncia Isabel. “Pero nós en realidade imos estar aquí todo o día dispostas a falar”.

Isabel asegura que o resto das traballadoras do edificio non teñen reparo en que estean alí, e están tendo unha acollida amable por case todas as persoas que están na xerencia, a excepción daquelas máis próximas ao xerente. Tamén recorda que, se están aquí hoxe, é pola falta de intención para dialogar en igualdade da USC, despois dun mes de mobilizacións e presións pacíficas. Na nota de prensa enviada pola propia asemblea, din tamén que os debates non poden ser monólogos por parte dos órganos da universidade, e que a USC “pode e debe cortar todas as relacións coas universidades israelís e con empresas vinculadas ás violacións dos dereitos do pobo palestino”.

A estudante remata contando que outra das actividades que teñen planeadas para hoxe son ‘free tours’ pola xerencia explicando de que xeito se relaciona esta co xenocidio Palestino. “Imos ir, ás plantas máis importantes, explicando que relación teñen en cada zona coa sinatura de contratos con empresas e con entidades israelíes”, explica Isabel. “Por exemplo, na planta primeira temos o servizo de Orzamentos, Contabilidade e Tesourería que onde se tecen as colaboracións con empresas que financian a USC e ao estado de Israel, tales como Santander ou HP”.

As participantes da asemblea recalcan que van estar aquí todo o día, preparadas para informar e a ofrecer galletas e chocolate a toda persoas disposta a aprender e comprender por que a USC aínda ten cousas que explicar sobre a súa relación con Israel.