Medio ambiente
Milleiros de persoas enchen A Pobra do Caramiñal para berrar contra a celulosa de Altri e a mina de Touro

Chove e venta, pero nin o clima máis adverso pode frear o berro de Galiza contra dous proxectos que atentan contra o seu medioambiente: a macrocelulosa de Altri e a mina de Touro-O Pino. “Xa tocaba que nos fixera mal tempo nalgunha das nosas manifestacións”, bromeaba Patricia Villarino, unhas das persoas detrás da Plataforma Ulloa Viva, ao comezo da mobilización.

Hoxe, A Pobra do Caramiñal (A Coruña) rebosa de xente. Miles de persoas chegadas de todo o país produciron un enorme embotellamento para entrar pola saída norte da autoestrada e os accesos á vila estiveron ateigados durante toda a mañá. Xusto a poucos metros do atasco, unha pintada de ‘Altri non baixo’ nunha ponte de pedra parece querer lembrar ás condutoras a que viñeron ata aquí.

Xa na Pobra, custa camiñar entre tantas manifestantes. “Mellor que chova que que mexen por nós”, berran desde a manifestación as convocantes, que tamén lle esixen a Rueda que “recúe” ante a intención de colocar esta celulosa na Ulloa, pero tamén ante a Mina de Touro, outra das razóns polas que moitas das persoas están hoxe aquí a pesar do mal tempo.

Desde o mar, centos de barcos observan a terra para lembrar que isto afectaría tamén ás nosas rías.

A Xunta di que todo é unha estratexia “dirixida” polo BNG e desoe o clamor social

Como vén sendo habitual ante toda mobilización social canta hai, o Goberno de Alfonso Rueda na Xunta di que o que aconteceu hoxe na Pobra do Caramiñal é unha estratexia política “dirixida” pola oposición. Neste caso, polo Bloque Nacionalista Galego (BNG).

Este mesmo sábado, a conselleira de Economía e Industria, María Jesús Lorenzana, reduciu ao “comunismo do século XXI” a protesta contra o proxecto Altri e Greenalia. Deixando a un lado as organizacións civís que fican detrás das manifestacións, Lorenzana prefire desviar o foco: “O PSOE hoxe colle a pancarta de Ana Pontón, porque, como lles pesa moito, o señor Besteiro e todos os demais dirixentes socialistas xa están axudando a Ana Pontón”.

Nun comunicado este sábado, Lorenzana afirmou que “as manifestacións están dirixidas e impulsadas polo BNG“, ”nada novo baixo o sol”. “Comunismo do século XXI, axitación de masas, desinformación, loitando en definitiva para que Galicia teña menos industria, para que os galegos sexan máis pobres e, polo tanto, menos libres”, asegura. Ademais, a conselleira do ramo di que “iso xa o fixeron con pellets, coa AP-9, con Alcoa”. 

[Haberá ampliación]