Violencia machista
Xornalistas Galegas: “Ler as experiencias das comunicadoras sobre violencia de xénero deixa a pel de pita”

O colectivo Xornalistas Galegas publicou o pasado 25 de Novembro un informe que pon de relevo a fenda de xénero que aínda existe nos medios de comunicación galegos. Claudia Morán, xornalista e membro da directiva deste colectivo, explica de onde nace o informe e advirte que “é fundamental que se tome en serie a perspectiva de xénero nos medios galegos”.

“Das 127 mulleres que contestaron a enquisa, 3 de cada 10 dixeron ter sufrido algún tipo de agresión ou acoso sexual”, denuncia Morán. “Desde Xornalistas Galegas levamos anos reivindicando que ten que existir a figura de editora de xenero dentro dos medios. Esta editora non ten que ver con que haxa contidos sobre feminismo, senón que ten unha persoa que se encargue de velar pola igualdade real nos contidos, nos enfoques e dentro do posto de traballo”.