Educación
Organizan un xantar reivindicativo en rexeitamento da mala calidade da comida no CPI de Mondariz

Continuamente as notas sobre manifestacións e actos performativos como modo de protesta enchen as noticias. A maioría das veces as historias proveñen de Catalunya, Madrid… e doutros países. Da a impresión de que a vida política e a organización social está relegada a esas zonas urbanas e cosmopolitas.

Mondariz, vila rural de Pontevedra, demóstranos o contrario. Nais e pais organizáronse o pasado 31 de maio para tomar o espazo público e manifestarse en contra do funcionamento e servizo de comedor da escola pública. Tras meses de presentar queixas e denuncias ante a Xunta de Galicia, recorreron a facer unha concentración seguida dunha comida comunitaria para as crianzas como último recurso para que as instancias institucionais presten atención.

No CPI de Mondariz hai 332 estudantes, dos cales 248 fan uso do servizo do comedor. O problema da mala calidade dos alimentos, sumado á planificación de menús que non pensados para a infancia, comezou a facerse visible cando as crianzas chegaban famentas a casa preguntando se sobrara algo do xantar.

O catering non fai mudanzas

As nais e os pais, ao decatarse de que non se trataba de casos illados, indagaron e tomaron cartas no asunto. A ANPA, asociación de nais e pais do CPI de Mondariz, pediu os permisos necesarios para que os familiares puidesen entrar a comer coas súas fillas e fillos e probar a comida. Ao final, a través de enquisas nas que se lles preguntou sobre a calidade da comida, fíxose unha valoración. Os resultados negativos resaltaron que os pratos eran insípidos e estaban mal servidos.

A dirección do CPI pediu ao catering responsable da elaboración dos alimentos explicacións sobre a situación. Tamén, que retirasen unha serie de pratos concretos que non son aceptados pola rapazada. Con todo, ás nais pareceulles que a empresa non ten interese nin a vontade de cambiar as cousas pois “mandan os mesmos pratos de novo e seguen facendo combinacións de menús que constan de dous pratos fríos", comenta una de ellas.

A maiores, a través do composteiro do colexio, chegouse a saber que cando é rexeitada a comida, o servizo de cátering tira diariamente potas industriais de comida ao lixo. Respecto diso, a tesoureira da ANPA Mamen Santiso Lage (46), nai dunha estudante do colexio, destaca que teñen o dereito para esixir un bo servizo debido a que “son os nosos impostos, creo que hai que vixiar que estean ben investidos. Que hai un cátering de Santiago ou de Vigo ou de Ponteareas que trae a comida en mal estado”.

Así, desde finais do ano pasado a ANPA tratou de poñerse en contacto coa Consellería de Educación para informar da situación no centro: “pedinlle ao conselleiro que viñese un día de sorpresa a comer cos nenos. Que comprobase que non proban a comida porque é de mala calidade”, comenta Mamen.

As responsabilidades

A responsabilidade dos servizos de cátering corresponde ao Departamento de Educación da Xunta de Galicia, quen leva a cabo unha poxa para elixir a empresa que preparará os alimentos. Aquela empresa que teña o prezo máis baixo é a que será contratada para alimentar a todo o alumnado da educación primaria e secundaria pública.

A tesoureira da ANPA di comprender a lóxica de competencias nos prezos para as contratacións do servizo de cátering, pero para ela iso non pode desligarse da calidade da comida que ofrecen ao alumnado: "eu non creo que iso teña que ser así. Aínda que ou custo sexa de dous euros, a calidade ten que ser boa por que se non é boa, estase a xogar coa saúde dúas nenos”.

Aínda que Mondariz sexa ata agora o único lugar no que se levou a cabo unha acción organizada deste tipo, o mesmo problema foi denunciado en concellos veciños nos que presta servizo a mesma empresa. Mamen Santiso conta que: "este é un cátering que traballa nas escolas de Ponteareas que tamén teñen o mesmo problema. Que pasa, que nunha delas, o cátering colleuno o Concello. Entón, o Concello lévao mellor. Pagan un chisco máis para que a comida sexa de maior calidade. Pero este cátering ten este problema en todas as zonas onde está”.

Sen resposta da Xunta

Despois de meses emitindo queixas, a ANPA non obtivo ningunha resposta que puidese facer parecer que este problema teña solución. “Tratamos de facer as cousas de maneira administrativa. Avisamos ao Conselleiro de Educación pero non nos fan caso, nin contestan ás dúas reclamacións por escrito que lles mandamos polo portal único dá Xunta. Entón os pais xa estamos fartos e moi enfadados porque non temos ningunha contestación. Polo menos que nos digan: estamos traballando en mellorar o servizo. Non. Entón a ANPA tivo unha xunta coas socias e socios da escola e decidimos facer unha concentración tipo protesta e despois imos comer todos xuntos. Sabemos que é fin de curso pero ou facemos para que saiban que o vindeiro curso seguímonos en pe de guerra porque nosos nenos están sen comer”, conclúe Santiso.

As nais e os pais xuntáronse na porta do CPI de Mondariz á hora de saída do colexio, xusto antes da hora de comida. Despois, no espazo deportivo contiguo á institución educativa, comezaron a montar carpas e mesas. Cadeiras, manteis, antucas e bolsas repletas de comida caseira saíron dos coches e foron dispostos para comezar o “xantar campestre” ao estilo dun serán.

Este modo de demostrar o rexeitamento e a inconformidade polos servizos públicos que se lles ofrecen é outro gran esforzo colectivo da poboación rural, para esixir a dignidade dos servizos públicos e, sobre todo, chamar a atención das instancias dun goberno autonómico que segue omitindo ou dando por certo a vida no campo.