Especulación urbanística
Dúas nonaxenarias vencen ao fondo voitre do Barrio do Cura e ao Concello de Vigo: as súas casas seguirán en pé

Os fondos voitres non sempre gañan, aínda tendo do seu lado ás administracións. O xulgado do Contencioso-Administrativo número 1 de Vigo ditou unha sentenza na que bota por terra os plans conxuntos do fondo Autonomy Global Opportunities, a promotora Gestilar e o Goberno de Abel Caballero de derrubar un edificio de pedra dos anos corenta onde, agora, soamente viven dúas señoras de máis de 90 anos que ían ser expropiadas forzosamente para construír unha urbanización de luxo, coñecida popularmente como Barrio do Cura. De feito, o proxecto autorizado polo goberno do PSOE pretendía demoler o edificio propiedade de nove familias de clase traballadora para transformalo nunha “zona verde” para unha urbanización que conta con pisos polos que se están pagando até 800.000 euros

Un fondo voitre contra unha nonaxenaria: cando unha urbanización de luxo quere botarte da casa

Javier H. Rodríguez

Especulación urbanística

Especulación urbanística Un fondo voitre contra unha nonaxenaria: cando unha urbanización de luxo quere botarte da casa

Javier H. Rodríguez

Nove familias enfróntanse ás administracións galegas e a un fondo de investimento para salvarse dunha expropiación forzosa. A “razón de utilidade pública e interese social” que as despraza é a construción de pisos de ata 800.000 euros.

Desta forma, na sentenza á que tivo acceso O Salto, a xuíza estima a demanda da Comunidade de Propietarios do edificio número 36 da rúa Santa Marta composta por estas nove familias diferentes, anulando o acordo da Xunta de Goberno Local do Concello de Vigo de novembro de 2022 no que aprobaron de forma definitiva ese proxecto de urbanización. O edificio foi deseñado polo prestixioso arquitecto galego Antonio de Cominges nos anos corenta e catalogado como patrimonio histórico co beneplácito da Xunta de Galicia e o Concello de Vigo.

Tras unha polémica e cuestionada casualidade, durante o período que transcorreu dende que se lanzou por primeira vez o primeiro plano deste pelotazo urbanístico, ambas as administracións decidiron descatalogar o edificio como de interese patrimonial, unha xogada burocrática sen apenas antecedentes no Estado español. Xunto á construción, polo de agora salvada, tamén se librou da demolición a Escola Infantil Santa Marta, de titularidade municipal.

O Concello de Vigo di que o proxecto segue “firme”

O Goberno de Vigo, condenado ademais a pagar as costas procesuais ás afectadas, di que a ordenación urbanística da urbanización de luxo segue “firme” malia anularse parte dela coa sentenza. A concelleira de Urbanismo, María José Caride (PSOE), explicou aos medios de comunicación que o texto xudicial “non afecta á modificación puntual” do plan nin á ordenación dese ámbito que continua, segundo a súa opinión, “vixente e firme”. Para a corporación de liderada por Abel Caballero, a sentenza apenas trata “algunhas deficiencias subsanables que xa están xustificadas nos informes técnicos que serviron de base para a súa aprobación”, pero esa subsanación, explica a concelleira de Urbanismo baixo o seu criterio, “non require a modificación de ningún elemento ou determinacións de transformación do Barrio do Cura”.

Un fondo voitre aniña no centro de Vigo respaldado polo Concello

Raúl Novoa González

Especulación urbanística

Un fondo voitre aniña no centro de Vigo respaldado polo Concello

Raúl Novoa González

O fondo norteamericano Autonomy Capital, do que é fundador o ex directivo de Lehman Brothers, Robert Gibbins, comprou a débeda do proxecto do Barrio do Cura en 2018. Agora, a veciñanza pide non ser abandoada ante a especulación urbanística e quere garantir o seu dereito á vivenda fronte unha posible expropiación do goberno local.

Esta urbanización de luxo proxectouse sobre un antigo convento reconvertido pola sociedade civil nunha alternativa habitacional para persoas empobrecidas e varios edificios propiedade de familias de clase traballadora. Coa conivencia da administración autonómica, gobernada polo Partido Popular, e da local, dirixida polo Partido Socialista, hoxe, de todas esas construcións soamente quedan en pé dúas: este edificio de pedra con tres alturas e a gardaría que, até novo aviso, salváronse.